تعرف علي اهم اسباب التي تؤثر علي نفسية المتداول

   سوف نتكلم في هذة المقالة عن نفسية المتداول سواء التداول في اسواق العملات الفوركس او البورصة او العملات الرقمية  غالبًا ما تكون السيكولوجية النفسية، و ليس نقص المعرفة أو المهارة الأكاديمية في التطبيق، هو المنشئ الأساسي لأخطاء المتداولين

نفسية المتداول والتحكم في  الانفعالات اكبر مشكله تواجه المتداول سواء محترف او مبتدئ لانها حاجة في طبيعة البشر… النفسية الانفعالات الغضب الانتقام  من السوق ودة بعد ما خسرت صفقة بيفتح مجال انك تخسر كل حاجة 

👇الي حابب يسمع المقالة اضغط علي الملف الصوتي 👇

اذن نفسية المتداول هي اكبر المشاكل التي تواجه المتداولين في اسواق المال

ازاي اقدر اتحكم في انفعالاتي ؟

عن طريق التمارين والتمرس لما تيجي تخسر صفقة مثلا

يجي شعور بالانتقام لازم اعوض الصفقه دي دلوقتي 

الحل انك تقفل  المنصة ومش تتداول هذا اليوم – عشان الموضوع مش يخرج عن إرادتك  – تعمل لنفسك عدد صفقات معين 3 مثلا لو خسرتهم خلاص يبقي تخرج من السوق

اتدرب عليها مره واتنين وتلاته

الموضوع صعب مش سهل لان دي بيخلي التداول اصعب مهنة في العالم

لان في ناس محترفين بيقعوا في الأخطاء دي كتير يكون خسر صفقة ويبقي عايز ينتقم من السوق  ويسترد الي خسره

فالخسارة المتتالية تجعلك لا ترى السوق بشكل صحيح فتبدأ تغلط وتخسر تاني وتفتح معاك خساره في خساره لحد ما تخسر رأس مالك كله وانت لا تدري

عشان كدة ضروري تحدد لنفسك عدد معين من الصفقات لو خسرتها في اليوم خلاص تغلق المنصة ولا تتداول في هذا اليوم

ويوجد عوامل كثيرة أخرى مثل انك تشتري سهم وتربح والسعر يسير في اتجاهك فتطمع اكتر!! وتقول هشتري تاني لحد ما السوق يعكس عليك وتخسر 

  ! وترجع تاني لفكرة الانتقام .. ازاي ده انا كنت كسبان الصفقة وعكست عليا

انا لازم ادخل صفقة تانى عشان اعوض الصفقة دي . وتدخل في نفس الدائرة المفرغة وهكذا

اذن العامل الاساسي بالفعل ان نفسية المتداول مشكله كبيره جدا تؤرق الجميع سواء متداول محترف او مبتدئ 

وانا كمان يقع في نفس المشكله دي كتير جدا . الفرق ان المحترف يقدر يتمالك نفسة ومش بيأثر معاه الموضوع مثل المبتدئين   

و انصحكم بشدة بكتاب مارك دوجلاس  ( التداول في المنطقة) الكتاب دة مفيد جدا في الموضوع دة والكتاب فية نسخة مترجمة للعربية

  الاستراتيجية وعلاقتها بنفسية المتداول

عامل مهم جدا لو قلنا ان نفسية المتداول رقم واحد  . يعتبر رقم اتنين الاستراتيجية نفسها لو انت واثق فيها سوف تعطيك ثقة وافضلية كبيرة جدا وتخليك تتحكم في موضوع النفسية  ” انا واثق ان استراتيجيتي قوية مش هنتقم ومش هدخل صفقات تانية سوف انتظر يوم جديد وفرصة جديدة بنفس الاستراتيجية بتاعتي “

 عشان كدة لازم تكون الاستراتيجية قوية – تربح بثبات  لانه احيانا أي استراتيجية بيجي اوقات وبتخسر –  عشان كدة من شروط الاستراتيجية الناجحة انه يكون ليها باك تيست لفترة كبيرة انها بتيجي فترة وبتخسر لكن بتعوض تاني الخساير دي

لكن لو مش عندك الداتا دي ولو مش واثق في الاستراتيجية يعتبر انت مفيش اساس شغال عليه – فاول خسارة ليك في الثانية في التالتة تقول الاستراتيجية دي غير صالحة للاستخدام
وفي متداولين كتير بيقعوا في المشكلة دي كل يوم يجرب استراتيجية – كلاسيكي – اليوت – جان – تحليل موجي…   مفيش حاجة اسمها كدة عشان تشتغل بسيستم معين بتقعد فترة كبيرة

انا شخصيا عشان ابدا اشتغل بأسلوب معين  قعدت سنين عشان ابدا اوصل لطريقة معينة عشان استخدمها باستمرار في السوق
الموضوع مش انك هتصحى من النوم كده فجاه ايه دة الراجل ده بيعمل رسومات حلوة والاستراتيجية دي عجبتني اخش معاه الكلام مش كدة ..

اولا عشان تختار الاستراتيجية لازم تكون الاستراتيجية دي تكون مناسبة لشخصيتك ؟ يعني ايه الكلام دة حقولك ان كل واحد  له شخصية
شخصيتي انا ممكن تناسب طريق معينة في السوق

واحد تاني شخصيته عاوز طرق بسيطة سهلة ويشتغل عليها

واحد تالت عاوز طريقة معقدة هي دي الي تعجبه

كل واحد له طريقة مختلفة عن التاني

السوق نفسة مش سوق الطريقة الواحدة – مفيش حاجة اسمها هي دي الطريقة بتاعت السوق اللي هتكسب بيها
       السوق دة يقبل العديد من الطرق تصلح لانها تعمل في اسواق المال

(أسواق المال ليست سوق الطريقة الواحدة )

اعرف ناس تعمل بطرق بسيطه جدا وتعمل ارباح الاف الدولارات شهريا – يعني لو رأيت الاستراتيجية هتقول ايه الطريقة الهبله دي ؟؟

انت نفسك ممكن لو اشتغلت بيها تخسر  والشخص التاني يشتغل بيها ويربح

انا مثلا شخص مناسب ليا طرق جان وموجات اليوت – شخص تاني يقولك لا يا عم اليوت ايه دي كلها ترقيم واشياء ملهاش لازمه وموجات تعيد رسم نفسها

شخص تاني يقولك دة جان طرقة كلها اي كلام –ايه الي هستفيد منه – انا عاوز اشتغل عرض وطلب وكلاسيكي .

نستنتج من كدة انه كل واحد عنده وجهه نظر وكل واحد فيه طريقة بيشتغل بيها وبيكسب بيها . مش لازم طريقتك انك كسبان بيها غيرك هيربح منها ايضا.

انا مثلا شغال بطريقة وبكسب منها – ممكن انت تاخدها وتتعلمها وتخسر 

هتقولي الطريقة سيئة لا طبعا

الفكره انك لازم تتاقلم مع الطريقة دي وتكون ايضا شخصيتك مناسبة للطريقة ايضا

وطبعا تكون عامل باك تيست وتكون متاكد ان الاستراتيجية دي مدروسة لفترة كبيرة ومرت بمراحل كتير في السوق ومتاكد منها وواثق فيها – تبدا تشوف مناسبة لشخصيتك أم  لا .

…ندخل في الجزئية الي بعد كدة

 الاشارات المتداخلة وعلاقتها بنفسية المتداول

       تعتبر من المشاكل الي بتواجة اغلب المتداولين وبتاثر علي نفسية المتداول بسبب انك بتستخدم حاجات كتير في السوق – في ناس بتضيع علي الشارت مئات المؤشرات والأدوات 

  من خطوط ودعوم ومقاومات وترندات تبص علي الشارت تلاقي لعبكة ولخبطة علي الشارت وكل دة بياثر بشكل كبير علي نفسية المتداول

 Keep it simple الموضوع بسيط

الشارت يكون بسيط وفاضي هو دة الي هيكسبك – انا في البداية طبعا كنت بضع مؤشرات وخطوط وتريندات وفيبو وكل هذا الكلام . فكنت يقع في مشكله الإشارات المتداخلة . هنا شرا وفيه خط تريند مدي اشارة بيع ولكن مؤشر ار اس اي مدي اشارة بيع . طب ؟هتشتغل ازاى في الكلام دة

اول حاجة ابعد عن المؤشرات تماما – لانها بتعيد رسم نفسها وبتتبع السعر ودي عقليه دة من زمان وانا مقتنع بيها حتي الان- مش بقولك هنا كل المؤشرات أغلب المؤشرات 90% منهم

يوجد عدد بسيط جدا من المؤشرات الي ممكن تستفيد منهم زي الموفينج افريج او الدايفرجنس .. وبطريقة معينة مش زي اغلب المتداولين ما بيشتغلو بيهم

  اذن الخلاصه لتحسين نفسية المتداول

 

قلل الخطوط على الشارت خليها بسيطة – اجعل الاستراتيجية بتاعتك هي الي تتكلم عن نفسها – مش بكتر الخطوط او المؤشرات علي الشارت بالعكس ممكن يكون الشارت فارغ تماما وتتداول بالبرايس اكشن او السلوك السعر وتلاقي الدنيا ماشية تماماخر شيء قرائة الشارت بشكل صحيح

هتيجي بناء علي كل الي قولنا قبل كدة  لان النفسية شغالة فلما تيجي تخسر صفقة هيولد عندك شعور بالانتقام –او  كسبت صفقتين فطمعت وعاوز تعمل المليون
بالتالي هتشوف الشارت بشكل تاني خالص هتلاقي نفسك بتخرف

 الاستراتيجية نفسها–استراتيجية ضعيفة وليست قوية وغير مناسبة لمتغيرات السوق وفيه طرق تجعلك لا تري الشارت يعني طرق تطبيقية مباشرة يكسر مستوي كذا تشتري – يكسر مستوي كذا تبيع . قرائة الشارت تيجي من خبره المتداول-

انك تعرف الترند رايح فين , افتح الفريم اليومي كدة انظر علي الاغلاقات اليومية عاملة ازاي- قفل مثلا علي مقاومة اسبوعية بقالها أسابيع لم تكسر-
اذن اتوقع الايام القادمة اعادة اختبار للمقاومة دي مثلا فابدا اشتري وهكذا

       قراءة الشارت بتيجي لما تربط لاحداث ببعض وربط الفريمات الكبيرة بالصغيرة ويكون عندك فهم للشارت – فيه بعض الناس بتفتح المؤشر أو الاستراتيجية بتاعتة-
ويمشي علي الاشارات شراء بيع شراء بيع وهو مش شايف السوق فين فاكيد هتخسر فكل الاسباب دي بتاثر علي نفسية المتداول 

او الناس اللي بتمشي بتوصيات والسوق مش كدة السوق متغير باستمرار ممكن تاخد توصية من أحد المحللين وتكون مناسبة لفترة معينة ساعه او اتنين… تاني يوم الصفقة دي هتبقي مضروبة لأن السوق اتغير تماما .اذن السوق مش بيمشي بموضوع توصيات لانه اصبح  فيه تحليل وفيه برايس اكشن وفيه نظرة مستقبلية للشارت وهكذا 

 اذن الخلاصة  ان نفسية المتداول من اهم المعايير التي ينبغي اي متداول ان يتعلمها ويتقنها ويتدرب عليها جيدا قبل الدخول في السوق الحقيقي لانها التي سوف تحدد اذا سوف تنجح في هذا المجال ام لا